മലപ്പുറം: വിശുദ്ധ റമസാനിലെ അവസാന വെള്ളിയാഴ്ച (ജുമുഅത്തുൽ വിദാഅ്) പുണ്യനിമിഷങ്ങൾക്ക് സാക്ഷിയാകാൻ മഅ്ദിൻ ഗ്രാൻഡ് മസ്ജിദിലേക്ക് ആയിരക്കണക്കിന് വിശ്വാസികളൊഴുകിയെത്തി. മഅ്ദിൻ അക്കാദമി ചെയർമാൻ സയ്യിദ് ഇബ്‌റാഹീമുൽ ഖലീൽ അൽ ബുഖാരി ജുമുഅ ഖുതുബയ്ക്കും പ്രാർത്ഥനയ്ക്കും നേതൃത്വം നൽകി.

വിശുദ്ധ മാസത്തോട് വിടപറഞ്ഞ് പ്രാർത്ഥന നടത്തുമ്പോൾ വിശ്വാസികളുടെ കണ്ണുകൾ ഈറനണിഞ്ഞു. ഇനിയുമൊരു റമസാനിനെ സ്വീകരിക്കാൻ ആയുസ്സും ആരോഗ്യവും നൽകണമെന്ന വിതുമ്പുന്ന പ്രാർത്ഥനകളോടെയാണ് വിശ്വാസികൾ പള്ളിമുറ്റത്ത് അണിനിരന്നത്.

ഖുതുബയിലെ പ്രധാന സന്ദേശങ്ങൾ:

• ആത്മവിശുദ്ധി കാത്തുസൂക്ഷിക്കുക: വിശുദ്ധ റമസാനിലൂടെ നേടിയെടുത്ത ഹൃദയവിശുദ്ധിയും ആത്മീയ ചൈതന്യവും ജീവിതത്തിലുടനീളം കാത്തുസൂക്ഷിക്കാൻ വിശ്വാസികൾ തയ്യാറാകണം.
• കാരുണ്യത്തിന്റെ തണലാവുക: സമൂഹത്തിലെ അശരണരുടെയും പാവപ്പെട്ടവരുടെയും സുഖദുഃഖങ്ങളിൽ പങ്കാളികളാവുകയും അവരുടെ കണ്ണീരൊപ്പാൻ മുന്നിട്ടിറങ്ങുകയും വേണം.
• ഫലസ്തീനായി പ്രത്യേക പ്രാർത്ഥന: അധിനിവേശത്തിന്റെയും ക്രൂരതകളുടെയും ഇരകളായി കഷ്ടപ്പെടുന്ന ഫലസ്തീൻ ജനതയുടെ സമാധാനത്തിനും മോചനത്തിനുമായി ചടങ്ങിൽ പ്രത്യേക പ്രാർത്ഥന നടത്തി.