സ്വലാത്ത് നഗർ: എഴുപത്തിയേഴാമത് റിപ്പബ്ലിക് ദിനത്തോടനുബന്ധിച്ച് ഭരണഘടനാ മൂല്യങ്ങൾ ഉയർത്തിപ്പിടിക്കുമെന്ന പ്രഖ്യാപനവുമായി മഅ്ദിൻ അക്കാദമിയിൽ പ്രൗഢോജ്ജ്വലമായ ഗ്രാൻഡ് അസംബ്ലി സംഘടിപ്പിച്ചു. ക്യാമ്പസ് അങ്കണത്തിൽ അണിനിരന്ന ആയിരക്കണക്കിന് വിദ്യാർത്ഥികൾ ഭരണഘടനയുടെ കരുത്തും സൗന്ദര്യവും വിളിച്ചോതുന്ന സർഗാത്മക ദൃശ്യാവിഷ്‌കാരങ്ങൾ അവതരിപ്പിച്ചു.

ദൃശ്യാവിഷ്‌കാരവും ഭരണഘടനാ സംരക്ഷണ പ്രതിജ്ഞയും

പ്ലക്കാർഡുകളിലൂടെ ഭരണഘടനയുടെ മുഖചിത്രം മനോഹരമായി പുനരാവിഷ്‌കരിച്ച വിദ്യാർത്ഥികളുടെ പ്രകടനം അസംബ്ലിയിലെ പ്രധാന ആകർഷണമായി. രാജ്യത്തിന്റെ പരമാധികാരവും മതേതരത്വവും സംരക്ഷിക്കാനുള്ള യുവതലമുറയുടെ പ്രതിജ്ഞാബദ്ധത വിളംബരം ചെയ്യുന്നതായിരുന്നു ഈ ദൃശ്യാവിഷ്‌കാരം. മഅ്ദിൻ അക്കാദമി ചെയർമാൻ സയ്യിദ് ഇബ്‌റാഹീമുൽ ഖലീൽ അൽ ബുഖാരി അസംബ്ലിയിൽ ഭരണഘടനാ സംരക്ഷണ പ്രതിജ്ഞ ചൊല്ലിക്കൊടുത്തു.

“ഇന്ത്യയുടെ ആത്മാവ് അതിന്റെ ഭരണഘടനയിലാണ്. വൈവിധ്യങ്ങളെ ചേർത്തുപിടിക്കുന്ന ഈ മഹത്തായ ഗ്രന്ഥം ഓരോ പൗരനും നൽകുന്ന സുരക്ഷയും സ്വാതന്ത്ര്യവും അതുല്യമാണ്. ഭരണഘടന വിഭാവനം ചെയ്യുന്ന സമത്വവും സാഹോദര്യവും കാത്തുസൂക്ഷിക്കാൻ ഓരോ ഇന്ത്യക്കാരനും ബാധ്യസ്ഥനാണ്. രാജ്യത്തെ ഭിന്നിപ്പിക്കാൻ ശ്രമിക്കുന്ന ഏത് നീക്കങ്ങളെയും സ്‌നേഹവും ഐക്യവും കൊണ്ട് നാം പ്രതിരോധിക്കണം.”
— സയ്യിദ് ഇബ്‌റാഹീമുൽ ഖലീൽ അൽ ബുഖാരി (ചെയർമാൻ, മഅ്ദിൻ അക്കാദമി)

പ്രൗഢോജ്ജ്വലമായ മാർച്ച് പാസ്റ്റും കലാപരിപാടികളും

ആഘോഷങ്ങളുടെ ഭാഗമായി നടന്ന ഗ്രാൻഡ് സെല്യൂട്ട്, സ്റ്റുഡന്റ്സ് പോലീസ് കേഡറ്റിന്റെയും (SPC) വിവിധ വിങ്ങുകളുടെയും മാർച്ച് പാസ്റ്റ് എന്നിവ അച്ചടക്കത്തിന്റെയും പ്രൗഢിയുടെയും നേർക്കാഴ്ചയായി. രാജ്യത്തിന്റെ സൗഹൃദവും മതേതരത്വവും സാംസ്‌കാരിക വൈവിധ്യവും വിളിച്ചോതുന്ന ഗാനശിൽപ്പവും കലാപ്രകടനങ്ങളും പരിപാടിക്ക് മാറ്റുകൂട്ടി. അക്കാദമി അധ്യാപകൻ ഹബീബ് സഅദി മൂന്നിയൂർ രചിച്ച വരികൾക്ക് ഹാഫിള് അസദ് പൂക്കോട്ടൂർ, ഹാഫിള് ശഹീർ പെരുമുഖം, ഹാഫിള് അബ്ദുൽ ഖാദർ എറണാകുളം എന്നിവർ ഈണം പകർന്നു. ചടങ്ങിൽ സയ്യിദ് മുഹമ്മദ് ഫാറൂഖ് ജമലുല്ലൈലി, സയ്യിദ് ഖാസിം സ്വാലിഹ് ഐദ്രൂസി, സയ്യിദ് അഹ്്മദുൽ കബീർ അൽ ബുഖാരി, സമസ്ത ജില്ലാ സെക്രട്ടറി ഇബ്‌റാഹീം ബാഖവി മേൽമുറി, അബൂബക്കർ സഖാഫി കുട്ടശ്ശേരി, അബൂബക്കർ സഖാഫി അരീക്കോട്, ഉമർ മേൽമുറി, ദുൽഫുഖാർ അലി സഖാഫി, പബ്ലിക് സ്‌കൂൾ പ്രിൻസിപ്പൽ സൈതലവിക്കോയ, നൗഫൽ കോഡൂർ, നൂറുൽ അമീൻ ലക്ഷദ്വീപ്, ശഫീഖ് മിസ്ബാഹി, ബഷീർ സഅദി വയനാട്, കെ.ടി. അബ്ദുസ്സമദ് സഖാഫി, ശൗക്കത്തലി സഖാഫി കച്ചേരിപ്പറമ്പ് തുടങ്ങിയ പ്രമുഖർ സംബന്ധിച്ചു. മഅ്ദിൻ അക്കാദമിക്ക് കീഴിലുള്ള വിവിധ വിദ്യാഭ്യാസ സ്ഥാപനങ്ങളിലെ വിദ്യാർത്ഥികളും അധ്യാപകരും ജീവനക്കാരും അസംബ്ലിയുടെ ഭാഗമായി.