മലപ്പുറം: അറബി ഭാഷാ രംഗത്തും മത-സാംസ്‌കാരിക പ്രബോധന മേഖലകളിലും അരനൂറ്റാണ്ടിലേറെയായി നൽകിവരുന്ന നിസ്തുല സേവനങ്ങൾ പരിഗണിച്ച് മഅ്ദിൻ അക്കാദമി ഏർപ്പെടുത്തിയ 2026-ലെ സയ്യിദ് അഹ്‌മദുൽ ബുഖാരി അവാർഡ് പ്രമുഖ പണ്ഡിതനും സമസ്ത കേന്ദ്ര മുശാവറ അംഗവുമായ തെന്നല അബൂഹനീഫൽ ഫൈസിക്ക് സമ്മാനിച്ചു.

മലപ്പുറം മഅ്ദിൻ മഹബ്ബ സ്‌ക്വയറിൽ നടന്ന പ്രൗഢമായ ചടങ്ങിൽ ആയിരങ്ങളെ സാക്ഷിയാക്കി സമസ്ത പ്രസിഡന്റ് ഇ. സുലൈമാൻ മുസ്ലിയാറും മഅ്ദിൻ ചെയർമാൻ സയ്യിദ് ഇബ്‌റാഹീമുൽ ഖലീൽ അൽ ബുഖാരിയും ചേർന്ന് പുരസ്‌കാരം കൈമാറി. ഒരു ലക്ഷം രൂപയും ഫലകവുമടങ്ങുന്നതാണ് അവാർഡ്. നൂറുകണക്കിന് വാഹനങ്ങളുടെ അകമ്പടിയോടെയും സ്വാഗതഗാനത്തോടെയുമാണ് അബൂഹനീഫൽ ഫൈസിയെ വേദിയിലേക്ക് ആനയിച്ചത്.

അരനൂറ്റാണ്ടിലേറെ നീണ്ട വിജ്ഞാന സേവനം

അറബി ഭാഷയുടെ സൗന്ദര്യവും വിജ്ഞാനവും ലോകത്തിന് പകർന്നുനൽകിയ മഹാമനീഷികൾക്കുള്ള ആദരമായാണ് മഅ്ദിൻ അക്കാദമി ഈ അവാർഡ് നൽകിവരുന്നത്.

• പഠനവും കർമരംഗവും: 1973-ൽ ഫൈസി ബിരുദം നേടി കർമരംഗത്തിറങ്ങിയ തെന്നല അബൂഹനീഫൽ ഫൈസി, കേരളത്തിലെ മദ്രസ വിദ്യാഭ്യാസത്തിന്റെ ചാലകശക്തിയായ സുന്നി ജംഇയ്യത്തുൽ മുഅല്ലിമീനെ ഇന്നത്തെ കരുത്തുറ്റ രൂപത്തിലേക്ക് വളർത്തുന്നതിൽ നിർണായക പങ്കുവഹിച്ചു.
• നേതൃത്വം: നിലവിൽ കൊണ്ടോട്ടി ബുഖാരി സ്ഥാപനങ്ങളുടെ ജനറൽ സെക്രട്ടറിയായും പ്രിൻസിപ്പലായും സേവനം ചെയ്തുവരുന്നു.
• സംഭാവനകൾ: അറബി ഭാഷാ പ്രചാരണത്തിനും മത-സാംസ്‌കാരിക പ്രബോധന മേഖലകൾക്കും നൽകിയ ആജീവനാന്ത സംഭാവനകൾ മുൻനിർത്തിയാണ് അദ്ദേഹത്തെ ഈ പുരസ്കാരത്തിനായി തിരഞ്ഞെടുത്തത്.

പൂർവസൂരികളുടെ നിരയിലേക്ക്

മുൻ വർഷങ്ങളിൽ കോടമ്പുഴ ബാവ മുസ്ലിയാർ, എ.കെ. അബ്ദുർറഹ്‌മാൻ മുസ്ലിയാർ, ഇ. സുലൈമാൻ മുസ്ലിയാർ, ചിത്താരി ഹംസ മുസ്ലിയാർ, പൊന്മള അബ്ദുൽ ഖാദിർ മുസ്ലിയാർ, കോട്ടൂർ കുഞ്ഞമ്മു മുസ്ലിയാർ, കൊമ്പം കെ.പി. മുഹമ്മദ് മുസ്ലിയാർ തുടങ്ങിയ പ്രഗത്ഭരായ പണ്ഡിതശ്രേഷ്ഠന്മാർക്കാണ് ഈ പുരസ്കാരം ലഭിച്ചിട്ടുള്ളത്. ആ പണ്ഡിതപരമ്പരയിലേക്കാണ് ഇപ്പോൾ തെന്നല അബൂഹനീഫൽ ഫൈസിയുടെ പേരും ചേർക്കപ്പെടുന്നത്.

ചടങ്ങിൽ സയ്യിദ് ശറഫുദ്ധീൻ ജമലുല്ലൈലി, സയ്യിദ് ബാഖിർ ശിഹാബ്, സയ്യിദ് കെ.വി. തങ്ങൾ, സയ്യിദ് സൈനുൽ ആബിദീൻ തങ്ങൾ മൂച്ചിക്കൽ, സയ്യിദ് സൽമാൻ മംഗലാപുരം, സയ്യിദ് പൂക്കോയ തങ്ങൾ വെളിമുക്ക്, സയ്യിദ് കുഞ്ഞിക്കോയ തങ്ങൾ ക്ലാരി, സയ്യിദ് പൂക്കോയ തങ്ങൾ മോങ്ങം, സയ്യിദ് മുഹമ്മദ് ഫാറൂഖ് ജമലുല്ലൈലി, സയ്യിദ് സ്വാലിഹ് ഖാസിം ഐദ്രൂസി, സയ്യിദ് അഹ്‌മദുൽ കബീർ അൽ ബുഖാരി, ഇബ്‌റാഹീം ബാഖവി മേൽമുറി, അബൂബക്കർ സഖാഫി കുട്ടശ്ശേരി, പ്രൊഫ. എ.കെ. ഹമീദ് സാഹിബ്, സി.കെ.യു. മൗലവി, മൂസ ഫൈസി ആമപ്പൊയിൽ, ബഷീർ ഹാജി ഉള്ളണം, ശരീഫ് കാരശ്ശേരി, മുസ്ഥഫ മാസ്റ്റര്‍ കോഡൂര്‍, സി പി ശഫീഖ് ബുഖാരി, കെ സ്വാദിഖലി ബുഖാരി, മുഹമ്മദലി ബുഖാരി, സി കെ റാശിദ് ബുഖാരി തുടങ്ങിയ പ്രമുഖർ സംബന്ധിച്ചു.